Ezekiel 48

Ukwabiwa Kwelizwe

1Lezi yizizwana, zihlelwe ngamabizo: Emngceleni wasenyakatho, uDani uzakuba lesigaba esisodwa; sizalandela umgwaqo weHethiloni oya eLebho Hamathi; iHazari Enani lasemngceleni weDamaseko wasenyakatho eduze leHamathi kuzakuba yingxenye yomngcele kusukela empumalanga kusiya entshonalanga.

2“U-Asheri uzakuba lesigaba esisodwa; sizangcelelana lelizwe likaDani kusukela empumalanga kusiya entshonalanga.

3“UNafthali uzakuba lesigaba esisodwa; sizangcelelana lelizwe lika-Asheri kusukela empumalanga kusiya entshonalanga.

4“UManase uzakuba lesigaba esisodwa; sizangcelelana lelizwe likaNafthali kusukela empumalanga kusiya entshonalanga.

5“U-Efrayimi uzakuba lesigaba esisodwa; sizangcelelana lelizwe likaManase kusukela empumalanga kusiya entshonalanga.

6“URubheni uzakuba lesigaba esisodwa; sizangcelelana lelizwe lika-Efrayimi kusukela empumalanga kusiya entshonalanga.

7“UJuda uzakuba lesigaba esisodwa; sizangcelelana lelizwe likaRubheni kusukela empumalanga kusiya entshonalanga.

8“Okungcelelana lelizwe likaJuda kusukela empumalanga kusiya entshonalanga kuzakuba yisigaba ozasethula njengesipho esiqakathekileyo. Sizakuba zingalo eziyizi-25,000 ububanzi, njalo ubude baso kusukela empumalanga kusiya entshonalanga buzalingana lobesinye sezigaba zezizwana; indlu engcwele izakuba phakathi kwaso.

9“Isigaba esiqakathekileyo ozasipha uJehova sizakuba zingalo eziyizi-25,000 ubude lengalo eziyizi-10,000 ububanzi. 10Lesi sizakuba yisigaba esingcwele sabaphristi. Sizakuba zingalo eziyizi-25,000 ubude ngasenyakatho, ingalo eziyizi-10,000 ububanzi ngasentshonalanga, ingalo eziyizi-10,000 ububanzi ngasempumalanga kanye lengalo eziyizi-25,000 ubude ngaseningizimu. Phakathi enkabeni yaso kuzakuba lendlu engcwele kaJehova. 11Lesi sizakuba ngesabaphristi abangcwelisiweyo, amaZadoki, ababethembekile ekungikhonzeni njalo abangaduhanga njengokwenziwa ngabaLevi ekuduheni kwama-Israyeli. 12Sizakuba yisipho esiqakathekileyo kubo sivela esigabeni esingcwele selizwe, isigaba esingcwele kakhulu, esingcelelane lesigaba sabaLevi.

13“AbaLevi bazakuba lesabelo esizingalo eziyizi-25,000 ubude lengalo eziyizi-10,000 ububanzi njalo sisekelane lesabaphristi. Ubude baso sonke buzakuba zingalo eziyizi-25,000 ububanzi baso buzingalo eziyizi-10,000.

14Akumelanga basithengise loba bantshintshe ngokunye kwaso. Lesi ngesihle kakhulu selizwe njalo akumelanga siphiwe abanye abantu ngoba singcwele kuJehova.

15“Indawo eseleyo, ingalo eziyizi-5,000 ububanzi lengalo eziyizi-25,000 ubude, izasetshenziswa nguzulu wedolobho, ngeyezindlu lamadlelo. Idolobho lizakuba phakathi kwayo 16njalo lizakuba lalezi izilinganiso: Icele lasenyakatho izingalo eziyizi-4,500, icele laseningizimu izingalo eziyizi-4,500, icele lasempumalanga izingalo eziyizi-4,500, lecele lasentshonalanga izingalo eziyizi-4,500. 17Amadlelo edolobho azakuba zingalo ezingama-250 ngasenyakatho, izingalo ezingama-250 ngaseningizimu, izingalo ezingama-250 ngasempumalanga, lezingalo ezingama-250 ngasentshonalanga. 18Indawo esalayo, engcelelane lesigaba esingcwele njalo ilandela ubude baso izakuba zingalo eziyizi-10,000 ngaseceleni lasempumalanga lezingalo eziyizi-10,000 ngaseceleni lasentshona-langa. Izithelo zayo zizakuba yikudla kwezisebenzi zedolobho. 19Izisebenzi ezivela edolobheni eziyilimayo zizavela kuzo zonke izizwana zako-Israyeli. 20Isigaba sonke sizalingana inxa zonke, izingalo eziyi-25,000 icele ngalinye. Njengesipho esiqakathekileyo uzaphawula isigaba esingcwele ndawonye lempahla yedolobho.

21“Okusalayo emaceleni womabili endawo eyisigaba esingcwele lempahla yedolobho kuzakuba ngokwenkosana. Kuzaqhubekela empumalanga kusukela ezingalweni eziyizi-25,000 zesigaba esingcwele kusiya emngceleni wasempumalanga, kuphinde kuye entshonalanga kusukela kuzingalo eziyizi-25,000 kusiya emngceleni wasentshonalanga. Izindawo lezi zombili ezilandela ubude bezigaba zezizwana zizakuba ngezenkosana, njalo isigaba esingcwele esilendawo engcwele yethempeli sizakuba phakathi kwazo. 22Ngakho impahla yabaLevi lempahla yedolobho kuzakuba phakathi kwendawo engeyenkosana. Indawo yenkosana izakuba phakathi komngcele kaJuda lomngcele kaBhenjamini.

23“Izizwana eziseleyo: UBhenjamini uzakuba lesigaba esisodwa; sizaqhubeka sisukela eceleni lasempumalanga sisiya eceleni lasentshonalanga.

24“USimeyoni uzakuba lesigaba esisodwa; sizangcelelana lelizwe likaBhenjamini kusukela empumalanga kusiya entshonalanga.

25“U-Isakhari uzakuba lesigaba esisodwa; sizangcelelana lelizwe likaSimeyoni kusukela empumalanga kusiya entshonalanga.

26“UZebhuluni uzakuba lesigaba esisodwa; sizangcelelana lelizwe lika-Isakhari kusukela empumalanga kusiya entshonalanga.

27“UGadi uzakuba lesigaba esisodwa; sizangcelelana lelizwe likaZebhuluni kusukela empumalanga kusiya entshonalanga.

28“Umngcele wangaseningizimu kaGadi uzahamba eningizimu usuka eThamarisiya emanzini aseMeribha Khadeshi, ubuye ulandele uMhotsha waseGibhithe uye eLwandle Olukhulu.

29“Leli yilizwe okumele ulabele izizwana zako-Israyeli njengelifa, njalo lezi zizakuba yizigaba zazo,” kutsho uJehova Wobukhosi.

Amasango Edolobho

30“Lezi zizakuba zintuba zedolobho zokuphuma: Kusukela eceleni lenyakatho, elizingalo eziyizi-4,500 ubude, 31amasango amathathu eceleni langenyakatho azakuba lisango likaRubheni, isango likaJuda lesango likaLevi.

32“Eceleni langempumalanga, elizingalo eziyizi-4,500 ubude, kuzakuba lamasango amathathu: isango likaJosefa, isango likaBhenjamini lesango likaDani.

33“Eceleni langeningizimu, elizingalo eziyizi-4,500, kuzakuba lamasango amathathu: isango likaSimeyoni, isango lika-Isakhari lesango likaZebhuluni.

34“Eceleni langentshonalanga, elizingalo eziyizi-4,500 ubude, kuzakuba lamasango amathathu: isango likaGadi, isango lika-Asheri lesango likaNafthali.

35“Ubude obubhoda indawo yonke buzakuba zingalo eziyizi-18,000. “Njalo ibizo ledolobho kusukela ngalesosikhathi kusiya phambili lizakuba: INKOSI IKHONA.”